السلام علیکم ورحمتہ اللہ وبرکاتہ! کیا حضرت غیر محرم سے محبت کرنا سنت ہے یا نہیں شادی سے پہلے۔ مع حوالہ جواب عنایت فرمائیں
المستفتی: محمد اظہرالدین، بہار (مقیم حال: بریلی شریف)
الجواب اللھم ھدایة الحق و الصواب
اسلام غیرمحرم لڑکے اور لڑکی کے درمیان نکاح کے علاوہ محبت کا کوئی تصور قبول نہیں کرتا۔ اسلام کے طرزِ معاشرت میں بوقتِ ضرورت غیر محرم سے بات کرنے میں بھی انتہائی محتاط انداز اپنانے کا حکم دیا گیا ہے۔ ارشاد باری تعالیٰ ہے:
يٰـنِسَآءَ النَّبِیِّ لَسْتُنَّ کَاَحَدٍ مِّنَ النِّسَآءِ اِنِ اتَّقَيْتُنَّ فَـلَا تَخْضَعْنَ بِالْقَوْلِ فَيَطْمَعَ الَّذِيْ فِيْ قَلْبِهِ مَرَضٌ وَّقُلْنَ قَوْلًا مَّعْرُوْفًا
اے ازواجِ پیغمبر! تم عورتوں میں سے کسی ایک کی بھی مِثل نہیں ہو، اگر تم پرہیزگار رہنا چاہتی ہو تو (مَردوں سے حسبِ ضرورت) بات کرنے میں نرم لہجہ اختیار نہ کرنا کہ جس کے دل میں (نِفاق کی) بیماری ہے (کہیں) وہ لالچ کرنے لگے اور (ہمیشہ) شک اور لچک سے محفوظ بات کرنا۔ (الاحزاب، 33: 32)
اگرچہ اس آیت مبارکہ میں ازواج مطہرات کو مخاطب کیا گیا ہے مگر اس کا پیغام قیامت تک آنے والی تمام عورتوں کے لیے ہے کہ کسی غیر محرم مرد سے ضروری بات کرتے ہوئے بھی نرم لہجہ اختیار نہ کیا جائے مبادا کہ نرم لہجہ اپنانے کو اشارہ و کنایہ ہی نہ سمجھ لیا جائے اور مخاطب اپنے دل میں کوئی جذبات پیدا کر لے۔ رسول اللہ صلی اللہ علیہ وآلہ وسلم نے تنہائی میں غیر محرم عورت کے پاس جانے اور اس سے ضروری بات چیت سے بھی منع کیا ہے۔ حضرت جابر رضی اللہ عنہ سے روایت ہے کہ نبی اکرم صلی اللہ علیہ وآلہ وسلم نے فرمایا:
لَا تَلِجُوا عَلَى المُغِيبَاتِ، فَإِنَّ الشَّيْطَانَ يَجْرِي مِنْ أَحَدِكُمْ مَجْرَى الدَّمِ، قُلْنَا: وَمِنْكَ؟ قَالَ: وَمِنِّي، وَلَكِنَّ اللَّهَ أَعَانَنِي عَلَيْهِ فَأَسْلَمُ.
(ترمذي، السنن، كتاب الرضاع، باب ما جاء في كراهية الدخول على المغيبات، رقم: 1172)
جن عورتوں کے خاوند موجود نہ ہوں ان کے پاس نہ جاؤ کیونکہ شیطان تمہاری رگوں میں خون کی طرح دوڑتا ہے۔ حضرت جابر فرماتے ہیں ہم نے عرض کیا، یا رسول اللہ! آپ کے لیے بھی ایسا ہی ہے؟ نبی اکرم صلی اللہ علیہ وآلہ وسلم نے فرمایا: ہاں میرے لیے بھی، لیکن اللہ تعالیٰ نے اس پر میری مدد فرمائی اور وہ (میرا ہمزاد) مسلمان ہو گیا۔
حدیث مبارکہ میں شیطان کا خون کی طرح دوڑنا، محاورتاً بولا گیا ہے۔ اس سے مراد یہ ہے کہ جب نامحرم عورت اور مرد تنہائی میں ہوتے ہیں تو جذبات ابھرتے ہیں اور شہوت جوش مارتی ہے جو برائی کی طرف مائل کرتی ہے۔ اسی طرح اگر غیرمحرم لڑکا اور لڑکی پریم پتر کریں، پیار و محبت کی باتیں کریں‘ تو قوی امکان ہے کہ وہ برائی پر آمادہ ہو جائیں گے۔
ایک اور حدیث مبارکہ حضرت عقبہ بن عامر رضی اللہ عنہ سے روایت ہے کہ رسول ﷲ صلی اللہ علیہ وآلہ وسلم نے فرمایا:
إِيَّاكُمْ وَالدُّخُولَ عَلَى النِّسَاءِ. فَقَالَ رَجُلٌ مِنْ الْأَنْصَارِ: يَارَسُولَ اللَّهِ أَفَرَأَيْتَ الْحَمْوَ؟ قَالَ: الْحَمْوُ الْمَوْتُ.
(بخاري، الصحيح، كتاب النكاح، باب لا يخلون رجل بامرأة إلا ذو محرم والدخول على المغيبة، رقم: 4934)
اپنے آپ کو تنہا (نامحرم) عورتوں کے پاس جانے سے بچاؤ۔ انصار سے ایک آدمی نے سوال کیا کہ یا رسول ﷲ! دیور کے بارے میں کیا ارشاد ہے؟ فرمایا: دیور تو موت ہے۔
اس حدیث مبارکہ میں صرف دیور نہیں بلکہ تمام نامحرم رشتے مثلاً جیٹھ، چچا زاد، ماموں زاد، خالہ زاد، پھو پھی زاد وغیرہ سب شامل ہیں۔ ایک حدیث حضرت ابن عباس رضی اللہ عنہما سے روایت ہے کہ نبی اکرم صلی اللہ علیہ وآلہ وسلم نے فرمایا:
لَا يَخْلُوَنَّ رَجُلٌ بِامْرَأَةٍ إِلَّا مَعَ ذِي مَحْرَمٍ. فَقَامَ رَجُلٌ فَقَالَ: يَارَسُولَ اللَّهِ امْرَأَتِي خَرَجَتْ حَاجَّةً وَاكْتُتِبْتُ فِي غَزْوَةِ كَذَا وَكَذَا. قَالَ: ارْجِعْ فَحُجَّ مَعَ امْرَأَتِكَ.
(بخاري، الصحيح، كتاب النكاح، 5 باب لا يخلون رجل بامرأة إلا ذو محرم والدخول على المغيبة: رقم: 4935)
تنہائی میں کوئی شخص کسی عورت کے پاس نہ جائے مگر اس کے محرم کے ساتھ۔ ایک شخص نے کھڑے ہو کر عرض کی یارسول ﷲ! میری بیوی حج کرنے جا رہی ہے اور (میں مسلمانوں کے ساتھ جنگ میں شریک ہونے جا رہا ہوں کیونکہ) میرا نام فلاں غزوہ میں لکھ لیا گیا ہے۔ آپ صلی اللہ علیہ وآلہ وسلم نے فرمایا: (غزوہ میں جانے کی بجائے) واپس جاؤ اور اپنی بیوی کے ساتھ حج کرو۔
غیرمحرم لڑکوں اور لڑکیوں کا مراسم استوار کرنا اور چھپ کر ملاقاتیں کرنا حرام ہے کیونکہ یہی ملاقاتیں زنا کا سبب بنتی ہیں۔ اللہ تعالیٰ نے زنا کا سدّباب کرنے کے لیے اس طرح کے تمام راستوں کو روکا ہے۔ ارشادِ باری تعالیٰ ہے:
وَلاَ تَقْرَبُواْ الزِّنَى إِنَّهُ كَانَ فَاحِشَةً وَسَاءَ سَبِيلاً.
اور تم زنا (بدکاری) کے قریب بھی مت جانا بیشک یہ بے حیائی کا کام ہے، اور بہت ہی بری راہ ہے۔ (بني اسرائيل، 17: 32)
مذکورہ دلائل سے واضح ہوتا ہے کہ اسلام نے غیرمحرم سے تعلق و آشنائی اور الفت و محبت کی بنیاد نکاح کو بنایا ہے۔ نکاح کے بغیر کسی غیرمحرم سے دوستی، محبت اور تعلق فعلِ حرام ہے اور منع ہے۔
ھذا ما ظہر لی واللہ اعلم بالصواب
کتبہ
العبد الحقیر الی ربہ الغفور
محمد شعیب رضا نظامی فیضی
خادم التدریس و الافتاء: جامعہ رضویہ اہل سنت، گولا بازار ضلع گورکھ پور یو۔پی۔
17 محرم الحرام 1445 ھ مطابق 5 اگست 2023 بروز ہفتہ